Wanafunzi wa Kadama English Medium School wakiwa
Hifadhi ya Taifa Serengeti
***
Shirika la Hifadhi za Taifa
Tanzania (TANAPA) limeipongeza Kadama English Medium School kwa kuwapa
wanafunzi fursa ya kujifunza kwa vitendo kupitia utalii wa ndani baada ya
kutembelea Hifadhi ya Taifa ya Serengeti mkoani Mara.
Ziara hiyo ya mafunzo ya wanafunzi
wa darasa la saba ilifanyika Agosti 9, 2026 ikiwa ni mara ya kwanza kwa shule
hiyo kuwapeleka wanafunzi kujifunza na kufanya utalii katika hifadhi hiyo
maarufu nchini.
Mwongoza watalii Shadrack
Ongoa amesema kuwa ziara za aina hiyo zina mchango mkubwa katika kuongeza
uelewa wa wanafunzi kwani zinawawezesha kuona kwa vitendo mambo wanayofundishwa
darasani.
Amesema wanafunzi wanapopata
nafasi ya kujifunza katika mazingira halisi huwa rahisi zaidi kuhusisha
nadharia wanazofundishwa darasani na kile wanachokiona katika maisha
halisi.
Aidha Ongoa ameipongeza Kadama
English Medium School kwa kuendelea kufanya vizuri katika mitihani ya kitaifa
kwa zaidi ya miaka mitano mfululizo.
Naye Mwalimu mkuu wa shule hiyo
Alex Joseph amesema kuwa ziara hizo zinawasaidia wanafunzi kuhusisha
masomo wanayojifunza kwenye vitabu na mazingira halisi wanayokutana nayo wakati
wa safari.
“Ziara hizi zimekuwa na mchango
mkubwa kwa wanafunzi kwa sababu wanapata nafasi ya kuona kwa vitendo kile
wanachojifunza darasani.Hii huwasaidia kuelewa zaidi na kuongeza uelewa wao,”
amesema.
Ziara ya Serengeti ni sehemu ya
utaratibu wa Kadama English Medium School wa kuwaandalia wanafunzi ziara za
kimasomo, hatua inayolenga kuunganisha elimu ya darasani na uzoefu wa maisha
halisi pamoja na kuhamasisha utalii wa ndani.