Wakulima wa pamba wametakiwa
kuzingatia usafi wakati wa kuvuna, kuhifadhi na kusafirisha zao hilo ili
kuongeza ubora na ushindani wa pamba ya Tanzania katika masoko ya ndani na nje
ya nchi.
Afisa Kilimo kutoka Bodi ya Pamba,
Doto Ntumba, amesema Tanzania ina maabara ya usanifu wa pamba iliyopo Shinyanga
inayohudumia pia nchi za Kenya na Uganda, huku ikiwa na vitengo vya usanifu wa
pamba kwa mikono na kwa kutumia mashine.
"Hapa tuna maabara za aina mbili, maabara ya usanifu wa mikono na maabara ya usanifu wa mashine.Wataalamu wetu wanapokea sampuli na kutoa madaraja ya pamba.Wakulima wakielimika, nasi tutaweza kuwa na pamba safi na tutauza kwenye soko, na pamba yetu itanunuliwa kwa wingi sana" amesema Doto
Amesema baadhi ya wakulima bado
huchanganya pamba na uchafu wakati wa uvunaji, uhifadhi na usafirishaji, jambo
linaloweza kushusha daraja na thamani ya zao hilo sokoni.
Doto amewataka waandishi wa habari
kuongeza elimu kwa wakulima kuhusu mbinu bora za kushughulikia pamba,
akisisitiza kuwa pamba safi na yenye ubora inaweza kuongeza mahitaji na soko la
zao hilo.