Mfuko wa
Fidia kwa Wafanyakazi (WCF) umepongezwa kwa kuendelea kuboresha huduma zake,
hususani katika matumizi ya mifumo ya Teknolojia ya Habari na Mawasiliano
(TEHAMA), hatua inayolenga kuongeza ufanisi katika kushughulikia madai na
malalamiko ya wafanyakazi wanaopata ajali au majanga yanayohusiana na kazi.
Pongezi
hizo zimetolewa wakati wa ushiriki wa WCF katika Maonyesho ya Tisa ya
Teknolojia ya Madini yanayofanyika Mkoani Geita, ambapo imeelezwa kuwa sekta ya
madini ni miongoni mwa sekta muhimu zinazochangia pato la Taifa na kuajiri
idadi kubwa ya Watanzania.
Kwa
mujibu wa taarifa iliyotolewa katika maonyesho hayo, sekta ya madini inachangia
takribani asilimia 10.1 ya Pato la Taifa, huku ongezeko la shughuli za
uchimbaji na ajira likifanya umuhimu wa huduma za WCF kuwa mkubwa zaidi kwa
wafanyakazi na wategemezi wao.
Imeelezwa
kuwa uwepo wa WCF umekuwa muhimu katika kuhakikisha wafanyakazi wanaopata
ajali, magonjwa au changamoto zinazotokana na mazingira ya kazi wanapata haki
zao za fidia kwa mujibu wa taratibu zilizowekwa.
Aidha,
WCF imepongezwa kwa kufikisha zaidi ya miaka kumi tangu kuanzishwa kwake na
kuendelea kuimarisha mifumo yake ya utoaji huduma. Miongoni mwa maboresho hayo
ni matumizi ya TEHAMA katika kushughulikia madai na malalamiko, jambo
linalolenga kurahisisha upatikanaji wa huduma kwa wafanyakazi na waajiri.
Katika
kipindi hicho, thamani ya mfuko imeelezwa kuongezeka kutoka takribani Sh
bilioni 770 hadi kufikia zaidi ya Sh trilioni 1.1, hali iliyotajwa kuwa sehemu
ya hatua za kuimarisha uwezo wa mfuko na kuhakikisha unatimiza majukumu yake
kwa ufanisi.
Aidha,
waajiri wametakiwa kuhakikisha wanajiunga na WCF na kutimiza wajibu wao ili
wafanyakazi wanapokumbwa na ajali au majanga yanayohusiana na kazi waweze
kupata fidia kwa wakati.
Pamoja na
hilo, WCF imetakiwa kuendelea kutoa elimu kwa wafanyakazi, hasa katika sekta ya
madini, ili kuwawezesha kufahamu haki zao, taratibu za kudai fidia na hatua
wanazopaswa kuchukua pale wanapopata ajali au changamoto zinazohusiana na kazi.
Imeelezwa
kuwa hapo awali kulikuwa na changamoto ya uelewa mdogo miongoni mwa wafanyakazi
wa sekta ya madini kuhusu huduma na majukumu ya WCF, lakini juhudi za utoaji
elimu zimeendelea kuongeza uelewa wa wafanyakazi kuhusu haki zao.
WCF
imepongeza kwa kuendelea kutekeleza majukumu yake kwa vitendo, huku
ikisisitizwa kuwa kuimarika kwa huduma za mfuko kunasaidia kulinda maslahi ya
wafanyakazi na wategemezi wao pale wanapokumbwa na majanga yanayotokana na
ajira.